کراچی (10 جون 2026): اورنگی ٹاؤن میں گھر سے دولہا کی لاش برآمد ہونے پر دلہن کو گرفتار کر لیا گیا۔ مقتول کو ہاتھ پاؤں باندھ کر اور منہ میں کپڑا ٹھونس کر پھندے سے لٹکایا گیا۔
پولیس حکام کے مطابق نوبیاہتے دولہا کو ہاتھ پاؤں باندھ کر اور منہ میں کپڑا ٹھونس کر پھندے سے لٹکا دیا گیا، دلہن کو گرفتار کر لیا گیا جس کی شناخت دعا کے نام سے ہوئی جو پولیس میں کانسٹیبل رہ چکی ہے۔
پولیس حکام نے بتایا کہ دولہا کی شناخت حمزہ کے نام سے ہوئی ہے جس کی لاش گھر سے پھندے سے لٹکی ہوئی ملی، اس کے جسم پر تشدد کے نشانات موجود ہیں، حمزہ کے ہاتھ پاؤں بندھے اور منہ میں کپڑا ٹھونسا ہوا تھا۔
یہ بھی پڑھیں: کراچی میں شادی کے روز دولہا لاپتا
پولیس حکام نے مزید کہا کہ ابتدائی شواہد خودکشی نہیں بلکہ قتل کی واردات کی نشاندہی کر رہے ہیں، دولہا اور دلہن دعا کی شادی کا ولیمہ 18 جون کو ہونا تھا۔
حمزہ کے والد کی مدعیت میں دلہن دعا اور اس کے سابق شوہر فہد کے خلاف قتل کا مقدمہ درج کر لیا گیا۔
پولیس حکام کا کہنا تھا کہ نوبیاہتا دلہن نے اہل خانہ کو اطلاع دی کہ دولہا حمزہ نے خودکشی کر لی ہے، جبکہ مقتول کے بھائی کے مطابق حمزہ ایک ہاتھ اور ایک پاؤں بندھی حالت میں لٹکا ہوا تھا۔
پولیس حکام نے مزید کہا کہ کرائم سین یونٹ نے اہم شواہد اکٹھے کر لیے اور مختلف پہلوؤں سے تحقیقات کر رہے ہیں، پوسٹ مارٹم رپورٹ سے موت کی اصل وجہ سامنے آئے گی۔
