غزہ (7 ستمبر 2025): فلسطینی مزاحمت کاروں نے غزہ پٹی سے اسرائیل پر 2 راکٹوں سے حملہ کر دیا۔
ٹائمز آف اسرائیل کی رپورٹ میں دعویٰ کیا گیا کہ اسرائیلی ڈیفنس فورسز نے کہا ہے کچھ دیر قبل غزہ پٹی سے اسرائیل کی جانب دو راکٹ فائر کیے گئے۔
اسرائیلی فوج نے دعویٰ کیا کہ ایک راکٹ کو فضا میں ناکام بنا دیا جبکہ دوسرا ایسے علاقے میں گرا جو غیر آباد ہے۔
واضح رہے کہ تین ہفتوں میں یہ پہلا موقع ہے جب غزہ سے مزاحمت کاروں کی جانب سے راکٹ فائر کیے گئے ہیں۔ راکٹ حملے کے بعد فوراً بعد نیٹیووٹ ٹاؤن اور آس پاس کے علاقوں میں سائرن بجائے گئے۔
میگن ڈیوڈ ایڈوم ایمرجنسی سروس نے کہا کہ راکٹ حملے میں کسی کے زخمی ہونے کی کوئی اطلاع نہیں جبکہ مالی نقصان بھی نہیں ہوا۔
قطری نشریاتی ادارے الجزیرہ کی رپورٹ کے مطابق فلسطینی اسلامی جہاد کے عسکری ونگ القدس بریگیڈ نے راکٹ حملے کی ذمہ داری قبول کر لی۔
