جامشورو : سندھ کے شہر جامشورو میں جنگلی گیدڑ نے 15 ماہ کی بچی اور اس کے والدین پر حملہ کردیا، ننھی بچی کے چہرے پر کئی زخم آئے ہیں۔
اے آر وائی نیوز جامشوروکے کے نمائندے دلدار جانوری کی رپورٹ کے مطابق نوری آباد کے قریب ایک گاؤں میں جنگلی گیدڑ نے گھر میں گھس کر مکینوں پر حملہ کردیا جس کے نتیجے میں 15ماہ کی بچی سمیت 3 افراد زخمی ہوگئے۔
واقعہ نوری آباد کے کوہستانی علاقے جوکھیا موڑ کےقریب گاؤں میں پیش آیا، زخمیوں میں 15ماہ کی بچی، خاتون اور اس کا شوہر شامل ہے جنہیں طبی امداد کیلیے فوری طور پر اسپتال منتقل کردیا گیا۔
علاقہ مکینوں نے بتایا کہ جنگلی گیدڑ نے معصوم بچی کو چہرے پر کاٹ کر بری طرح زخمی کر دیا، اہل خانہ کے شور مچانے پر جنگی گیدڑ گھر سے بھاگ گیا۔
ڈسٹرکٹ ہیلتھ آفیسر جامشورو پیر غلام حسین نے میڈیا نمائندوں کو بتایا کہ تینوں متاثرہ افراد کو ڈاگ بائٹ ویکسین کی پہلی ڈوز لگادی گئی ہے۔ زخمیوں کی حالت خطرے سے باہر ہے۔
