کراچی : قومی انڈر 19 کرکٹ ٹیم کے مینٹور اور سابق کپتان سرفراز احمد نے کہا ہے کہ اندازہ نہیں تھا کہ ایسا یکطرفہ کھیل ہوگا۔
اے آر وائی نیوز کے پروگرام الیونتھ آور میں خصوصی گفتگو کرتے ہوئے انہوں نے کہا کہ انڈر19 ٹیم کی کامیابی کا کریڈٹ کھلاڑیوں اور مینجمنٹ کو جاتا ہے۔
ایک سوالے جواب میں سرفراز احمد کا کہنا تھا کہ مجھے اندازہ نہیں تھا کہ ایسا یکطرفہ کھیل ہوگا، بھارت کی ٹیم اپنے گروپ میں ٹاپ پر تھی۔
لڑکوں سے کہا تھا کہ نیچرل گیم کھیلیں، کھلاڑیوں کو بتایا تھا کہ کھل کر کھیلیں جو بھی نتیجہ آئے، ہم آپ کے ساتھ کھڑے ہونگے۔ محسن نقوی کا شکریہ ادا کرتا ہوں کہ بچوں کو بہت پذیرائی دی۔
ٹیم کو بتایا فائنل میں کچھ بھی ہو ہم آپ کے ساتھ کھڑے ہونگے، وزیراعظم اور فیلڈ مارشل نے بھی ٹیم کے کھلاڑیوں کو مبارکباد دی اور سراہا۔
بھارت کیخلاف بہت سے میچز کھیلے ہیں، میں نے بھارت کی اس ٹیم کے ساتھ کھیلا ہے جن میں اسپورٹس مین اسپرٹ تھی، کرکٹ اور سیاست کو الگ رکھنا چاہیے اور جینٹل مین کرکٹ کو سپورٹ کرنا چاہیے۔
انشااللہ انڈر19ورلڈ کپ کیلئے بھرپور تیاری کریں گے، یہ بچے آنے والے دنوں میں پاکستان کا مزید نام روشن کرینگے۔
قبل ازیں انڈر 19 ایشیا کپ میں شاندار کامیابی کے بعد قومی انڈر 19 ٹیم کے کوچ، مینٹور اور کھلاڑیوں نے اسلام آباد میں مشترکہ پریس کانفرنس کی۔
اس موقع پر انہوں نے کہا کہ بھارت کو شکست دے کر کھلاڑیوں نے قوم کا سر فخر سے بلند کیا، فائنل میں سمیر منہاس نے شاندار اننگز کھیلی، جبکہ دیگر کھلاڑیوں نے بھی مجموعی طور پر عمدہ کارکردگی کا مظاہرہ کیا۔
ان کا کہنا تھا کہ ورلڈ کپ سے قبل اس کامیابی نے ٹیم کے اعتماد میں نمایاں اضافہ کیا ہے۔ ایک سوال کے جواب میں سرفراز احمد نے کہا کہ فی الحال مینٹور کی ذمہ داری نبھانا ہی کافی ہے، ورلڈ کپ سے قبل ایسی فتح یقیناً اعتماد میں اضافہ کرتی ہے۔
