بھارت کی ریاست تلنگانہ میں سرکاری اسپتال کے عملے کی سنگین غفلت کے باعث ایک زندہ مریض کو مردہ قرار دے کر مردہ خانے بھیج دیا گیا۔
تاہم بروقت انکشاف پر اس کی جان بچ گئی، واقعے نے عوام میں شدید غم و غصے کی لہر دوڑا دی ہے، جب کہ حکام نے فوری طور پر تحقیقات کا حکم دے دیا ہے۔
بھارتی میڈیا رپورٹس کے مطابق یہ افسوسناک واقعہ تلنگانہ کے شہر محبوب آباد میں پیش آیا، جہاں سرکاری اسپتال کے عملے نے 45 سالہ راجو نامی شخص کو زندہ ہوتے ہوئے بھی مردہ قرار دے دیا۔
ٹریکٹر ڈرائیور راجو کا تعلق جیارام گاؤں سے ہے وہ ٹانگ میں درد اور گردوں کے مسائل کے علاج کے لیے کئی بار اسپتال آیا لیکن عملے نے مبینہ طور پر اس کا علاج کرنے سے انکار کر دیا کیونکہ اس کے پاس شناختی کارڈ نہیں تھا اور کوئی تیماردار بھی ساتھ موجود نہیں تھا۔
راجو جمعرات کے روز اسپتال کے مردہ خانے کے قریب بےہوش ہو کر گرگیا، اسپتال کے عملے نے اسے دیکھ کر غلطی سے مردہ قرار دے دیا اور بغیر تصدیق کے اس کی “لاش” مردہ خانے میں رکھ کر دروازہ باہر سے بند کر دیا۔
پولیس کے مطابق کچھ دیر بعد صفائی کے عملے نے اندر سے حرکت محسوس کی اور فوراً انتظامیہ کو اطلاع دی۔ اطلاع ملنے پر پولیس موقع پر پہنچی اور راجو کو فوری طبی امداد فراہم کرائی، جس کے بعد اس کی حالت مستحکم ہوگئی۔
اسپتال کے میڈیکل آفیسر نے میڈیا سے گفتگو میں کہا کہ واقعے کی اندرونی تحقیقات شروع کر دی گئی ہیں اور ذمہ داروں کے خلاف کارروائی کی جائے گی۔
انہوں نے یقین دہانی کرائی کہ آئندہ کسی مریض کو شناخت یا تیماردار کی عدم موجودگی کے باعث علاج سے محروم نہیں کیا جائے گا۔
یہ واقعہ اسپتال کے عملے پر مقامی آبادی میں غم و غصے کا باعث بن گیا ہے۔ شہریوں نے حکومت سے مطالبہ کیا ہے کہ سرکاری اسپتالوں میں بہتر انتظامات، عملے کی تربیت اور مریضوں کی دیکھ بھال کے معیار کو یقینی طور پر بہتر بنایا جائے تاکہ اس نوعیت کے واقعات دوبارہ پیش نہ آئیں۔
