نیویارک : دنیا بھر میں بے حد مقبول ویڈیو گیم سیریز گرینڈ تھیفٹ آٹو (جی ٹی اے ) کی نئی قسط جی ٹی اے 6کی باضابطہ ریلیز سے قبل ہی بعض ممالک میں اس پر پابندی یا سخت پابندیوں کے قوی امکانات ہیں۔
مختلف ممالک کی حکومتیں ویڈیو گیم میں موجود تشدد، جرائم اور بالغوں کے لیے مخصوص مواد پر تحفظات کا کھل کر اظہار کر رہی ہیں، تاجکستان نے گیم پر پابندی برقرار رکھنے کا باقاعدہ اعلان کردیا۔
میڈیا رپورٹس کے مطابق جی ٹی اے 6 کی متوقع ریلیز 19 نومبر 2026 کو ہونے جا رہی ہے، تاہم بعض ممالک پہلے ہی اس فرنچائز کے خلاف سخت موقف اختیار کیے ہوئے ہیں۔
تازہ ترین توجہ وسطی ایشیائی ملک تاجکستان کی جانب سے سامنے آئی ہے، جہاں حکام نے جی ٹی اے سیریز پر عائد پابندی برقرار رکھنے کا عندیہ دیا ہے۔
تاجک حکام کا مؤقف ہے کہ جی ٹی اے جیسے کھیل چوری، قتل اور دیگر مجرمانہ سرگرمیوں کو نمایاں کرتے ہیں، جو نوجوان کھلاڑیوں پر منفی اثرات مرتب کر سکتے ہیں۔ حکومت نے 2024 میں بھی متعدد ویڈیو گیمز، بشمول جی ٹی اے اور Counter-Strike، پر پابندیاں عائد کی تھیں۔
تاجک حکام کے مطابق ایسے کھیل قومی اقدار سے مطابقت نہیں رکھتے اور نوجوان نسل میں جرائم کی حوصلہ افزائی کر سکتے ہیں۔
اس کے علاوہ تھائی لینڈ بھی ان ممالک میں شامل ہے جہاں 2008 سے جی ٹی اے سیریز پر مکمل پابندی عائد ہے، یہ فیصلہ ایک ایسے مجرمانہ واقعے کے بعد کیا گیا تھا جسے مبینہ طور پر گیم سے متاثر قرار دیا گیا تھا۔
View this post on Instagram
ملائشیا میں بھی پرتشدد ویڈیو گیمز پر مختلف نوعیت کی پابندیاں اور ضوابط نافذ ہیں، جن میں جی ٹی اے سیریز بھی شامل رہی ہے۔
دوسری جانب بعض ممالک نے مکمل پابندی کے بجائے ترمیم شدہ یا سنسر شدہ ورژن کی اجازت دینے کی پالیسی اختیار کی ہے۔ جرمنی اور آسٹریلیا ماضی میں ایسے گیمز کے لیے ترمیم شدہ ایڈیشنز کی شرط عائد کرتے رہے ہیں جن میں شدید تشدد یا حساس مواد شامل ہو۔
تجزیہ کاروں کا کہنا ہے کہ جی ٹی اے سیریز ماضی میں بھی عالمی سطح پر تنازعات اور سنسرشپ کا سامنا کرتی رہی ہے، اور جی ٹی اے 6 کی آمد کے ساتھ یہ بحث ایک مرتبہ پھر زور پکڑتی دکھائی دے رہی ہے۔
