بالی ووڈ اداکارہ کرینہ کپور نے سوشل میڈیا پوسٹ میں جسپریت بمراہ کو چیلنج کرکے مداحوں کی توجہ حاصل کرلی ہے۔
فوٹو اور ویڈیو شیئرنگ ایپ انسٹاگرام پر 45 سالہ کرینہ کپور نے تصاویر شیئر کیں جس میں وہ بڑے بیٹے تیمور علی خان کے ساتھ کرکٹ کھیل رہی ہیں۔
تصاویر میں دیکھا جاسکتا ہے کہ کرینہ بیٹے کو بولنگ کروارہی ہیں۔
تصاویر میں اداکارہ گلابی شرٹ، نیلی جینز اور سفید اسنیکرز میں ملبوس نظر آئیں جبکہ کرکٹ کھیلتے ہوئے ان کا پُرجوش انداز مداحوں کو خوب پسند آیا۔
اس کے ساتھ ہی بے بو نے مزاحیہ انداز میں لکھا کہ ’میرے ٹیلنٹ کو کم نہ سمجھیں، میں بمراہ سے بھی مقابلہ کرسکتی ہوں۔‘
اس سے قبل ایک انٹرویو میں کرینہ کپور نے بتایا تھا کہ میرے بیٹے تیمور کو فلموں کے ساتھ ساتھ کرکٹ اور فٹ بال کا بھی بے حد شوق ہے اور وہ کھیلوں میں خصوصی دلچسپی رکھتے ہیں۔
دوسری جانب جسپریت بمراہ دنیا کے بہترین فاسٹ بولرز میں شمار کیے جاتے ہیں اور سنسنی خیز میچوں میں اپنی شاندار بولنگ کے لیے شہرت رکھتے ہیں۔
