جدہ : سعودی عرب سے کراچی آنے والی پرواز کے مسافر عید کا دن ایئرپورٹ پر گزارنے پر مجبور رہے، طیارہ 48 گھنٹے بعد بھی روانہ نہ ہوسکا۔
اے آر وائی نیوز کی رپورٹ کے مطابق ذرائع کا کہنا ہے کہ سعودی عرب سے کراچی کی پرواز 48 گھنٹے بعد بھی اڑان نہ بھر سکی، مسافر ایئرپورٹ پر پھنس گئے جنہیں کئی گھنٹوں بعد مقامی ہوٹل منتقل کیا گیا۔
ذرائع نے بتایا ہے کہ ایس وی 1429 کی پرواز روانگی کے وقت تکنیکی خرابی کے سبب تاخیر کا شکار ہوئی، پرواز سے 150 کے قریب مسافروں کو عید کے پہلے روز کراچی پہنچنا تھا۔
پرواز نے مدینہ سے جدہ اور وہاں سے صبح 8 بجے کراچی پہنچنا تھا، مذکورہ صورتحال کے پیش نظر مسافروں کو طیارے سے اتارا گیا اور کئی گھنٹے انتظار کے بعد ہوٹل منتقل کیا گیا۔
ذرائع کے مطابق مسافروں کو جس ہوٹل میں قیام کی سہولت فراہم کی گئی وہاں انتہائی ناقص انتظامات ہیں
طویل انتظار سے مسافروں کے پاس اخراجات کیلیے رقم بھی ختم ہوچکی ہے۔ پھنسنے والے مسافروں میں خواتین اور بچے بھی شامل ہیں۔
