تہران (21 اپریل 2026): ایرانی وزیر خارجہ عباس عراقچی نے امریکا کی جانب سے ملکی بندرگاہوں کی ناکہ بندی کو جنگی عمل قرار دے دیا۔
عباس عراقچی نے سوشل میڈیا پلیٹ فارم ایکس پر لکھا کہ ایرانی بندرگاہوں کی ناکہ بندی جنگی عمل ہے، ناکہ بندی جیسے اقدامات جنگ بندی کی خلاف ورزی بھی ہیں۔
یہ بھی پڑھیں: امریکا ایران جنگ بندی ختم ہونے کے قریب، پاکستان نے سفارتی کوششیں تیز کر دیں
ایرانی وزیر خارجہ نے لکھا کہ تجارتی جہاز پر حملہ کرنا اور عملے کو یرغمال بنانا جنگ بندی کی بڑی خلاف ورزی ہے، ایران اس طرح کی پابندیوں کو بے اثر کرنے کے طریقے جانتا ہے اور یہ بھی جانتا ہے کہ مفادات کا دفاع اور غنڈہ گردی کا مقابلہ کیسے کرنا ہے۔
Blockading Iranian ports is an act of war and thus a violation of the ceasefire.
Striking a commercial vessel and taking its crew hostage is an even greater violation.Iran knows how to neutralize restrictions, how to defend its interests, and how to resist bullying.
— Seyed Abbas Araghchi (@araghchi) April 21, 2026
واضح رہے کہ عباس عراقچی کی جانب سے مذکورہ بیان امریکی نائب صدر جے ڈی وینس کے دورہ پاکستان مؤخر کیے جانے کی خبر کے فوراً بعد سامنے آیا ہے۔
قبل ازیں، نیویارک ٹائمز نے اپنی خبر میں دعویٰ کیا کہ امریکی نائب صدر جے ڈی وینس کا دورہ پاکستان مؤخر کر دیا گیا ہے۔
ٹرمپ انتظامیہ کے سینئر اہلکاروں نے نیویارک ٹائمز سے گفتگو میں کہا کہ ایران کا مثبت ردعمل نہ آنے پر جے ڈی وینس کا دورہ مؤخر کیا گیا، البتہ تہران کا مثبت ردعمل آنے پر فیصلہ تبدیل کیا جا سکتا ہے۔
اس سے قبل ایرانی وزارت خارجہ کے ترجمان کی جانب سے جاری بیان میں کہا گیا کہ امریکا کے ساتھ مذاکرات کیلیے ایرانی وفد کے اسلام آباد جانے کا فیصلہ ابھی نہیں ہو سکا۔
ترجمان اسماعیل بقائی نے کہا کہ امریکی بحری ناکہ بندی، ایرانی جہاز پر قبضے اور امریکی صدر ڈونلڈ ٹرمپ کی دھمکیوں پر سخت تشویش ہے، ہم نیک نیتی اور سنجیدگی سے مذاکرات میں گئے لیکن امریکی حکام نے غیر سنجیدگی ظاہر کی۔
