لاہور(3 ستمبر 2025): بانی پی ٹی آئی عمران خان کی ہمشیرہ علیمہ خانم نے اپنے بھائی کی صحت سے متعلق افواہوں کو مسترد کردیا۔
لاہور: پاکستان تحریک انصاف (پی ٹی آئی) کے بانی عمران خان کی بہن علیمہ خان نے لاہور میں انسداد دہشت گردی عدالت کے باہر میڈیا سے گفتگو کرتے ہوئے عمران خان کی صحت سے متعلق خدشات کو مسترد کردیا ہے۔
انہوں نے مطالبہ کیا کہ عمران خان کا طبی معائنہ ان کے ذاتی ڈاکٹروں کی موجودگی میں کیا جائے تاکہ شفافیت اور اعتماد کو یقینی بنایا جا سکے۔
علیمہ خانم کا کہنا تھا کہ عظمیٰ خان نے بانی پی ٹی آئی کی صحت کے بارے میں دریافت کیا، وہ خود ڈاکٹر ہیں، بانی پی ٹی آئی بالکل ٹھیک ہیں، سوشل میڈیا پر فیک خبریں پھیلائی جا رہی ہیں۔
انہوں نے مزید کہا کہ میڈیا اور سوشل میڈیا خبر چلانے سے پہلے ہم سے تصدیق کر لیا کریں، بانی پی ٹی آئی کی صحت کے بارے میں سنسنی پھیلائی جا رہی ہے۔
انہوں نے یہ بھی ذکر کیا کہ صرف پی ٹی آئی کے چیئرمین بیرسٹر گوہر علی خان کو عمران خان سے ملاقات کی اجازت دی گئی ہے، دوسری جانب علیمہ خان نے سلمان اکرم راجہ کے ساتھ اختلافات کی خبروں کو مسترد کیا ہے۔
اس سے قبل، علیمہ خان نے واضح کیا تھا کہ سلمان اکرم راجہ کے ساتھ کوئی اختلاف یا بحث نہیں ہوئی، انہوں نے کہا کہ وہ اب بھی پی ٹی آئی کے وکیل ہیں اور انہیں “خاندان کی طرح” سمجھا جاتا ہے۔
