سابق کپتان شاہد آفریدی کا کہنا ہے کہ احمد شہزاد اور عمر اکمل کو پی ایس ایل میں ہونا چاہیے تھا۔
نجی ٹی وی سے گفتگو کرتے ہوئے سابق کپتان شاہد آفریدی نے کہا کہ ہم کچھ کھلاڑیوں کو بالکل ہی نظر انداز کردیتے ہیں، مجھے امید تھی کہ دو نئی ٹیمیں آنے کے بعد ہمارے کچھ کرکٹرز کو شامل کیا جائے گا۔
انہوں نے کہا کہ عمر اکمل اور احمد شہزاد کھیل بھی رہے ہیں، جم میں ورزش کرتے بھی دکھائی دے رہے ہیں، انہیں عزت دینی چاہیے۔
شاہد آفریدی نے کہا کہ دونوں کھلاڑیوں کی ماضی میں کارکردگی شاندار رہی ہے، انہیں موقع ملنا چاہیے تھا۔
سابق کپتان نے کہا کہ اگر میں کسی ٹیم میں ہوتا تو ان دونوں کو لازمی اپنے ساتھ رکھتا، اگر رویے کا مسئلہ ہے تو گھر میں ہر بچہ ایک جیسا نہیں ہوتا ان کو ایک طریقے سے چلایا جاسکتا تھا۔
انہوں نے کہا کہ اصل چیز کارکردگی ہوتی ہے آپ کو اس بات کا علم ہونا چاہیے کہ کس کھلاڑی سے کس طرح سے کام لینا چاہیے۔
واضح رہے کہ احمد شہزاد اور عمر اکمل کا نام پی ایس ایل آکشن میں شامل نہیں تھا۔
