فیس بک نے اپنے مونیٹائزیشن نظام میں اہم تبدیلی کردی ہے جس کے سبب کم فالوورز رکھنے والے نئے کانٹینٹ کریئیٹرز بھی ڈالرز میں کمائی کرسکیں گے۔
دنیا کے مقبول ترین سوشل میڈیا پلیٹ فارمز میں شمار ہونے والے فیس بک نے اپنے مونیٹائزیشن نظام میں اہم تبدیلیاں متعارف کرا دی ہیں، جن کے بعد کم فالوورز رکھنے والے صارفین اور نئے کانٹینٹ کریئیٹرز کے لیے بھی آمدنی حاصل کرنا نسبتاً آسان ہوگیا ہے۔
نئی پالیسی کے تحت فیس بک نے بعض اکاؤنٹس اور پیجز کے لیے مونیٹائزیشن کے معیار میں نرمی کی ہے، جس کا مقصد زیادہ سے زیادہ تخلیق کاروں کو اپنے مواد سے مالی فوائد حاصل کرنے کا موقع فراہم کرنا ہے۔
ماضی میں مونیٹائزیشن پروگرام میں شامل ہونے کے لیے فالوورز کی بڑی تعداد، طویل واچ ٹائم اور دیگر سخت اہداف پورے کرنا ضروری تھے، جس کی وجہ سے بہت سے نئے صارفین اس سہولت سے فائدہ نہیں اٹھا پاتے تھے۔
28 دنوں میں 3 لاکھ ویوز کی شرط
تازہ پالیسی کے مطابق اگر کوئی پیج یا پروفائل 28 دن کے اندر 3 لاکھ ویوز حاصل کر لیتا ہے تو اسے فیس بک کے ’’کانٹینٹ مونیٹائزیشن ٹول‘‘ تک رسائی مل سکتی ہے، جس کے ذریعے تخلیق کار اپنے مواد سے آمدنی کما سکتے ہیں۔
ڈیجیٹل میڈیا ماہرین کا کہنا ہے کہ یہ نیا معیار پہلے کے مقابلے میں زیادہ قابلِ حصول ہے، خاص طور پر ان صارفین کے لیے جو مستقل بنیادوں پر ویڈیوز، ریلز اور دیگر دلچسپ مواد شائع کرتے ہیں۔
تاہم ماہرین نے اس بات پر زور دیا ہے کہ صرف ویوز حاصل کرنا کافی نہیں ہوگا بلکہ مونیٹائزیشن کے لیے فیس بک کی کمیونٹی گائیڈ لائنز، کاپی رائٹ قوانین اور دیگر پالیسیوں کی مکمل پابندی بھی ضروری ہوگی۔ قواعد کی خلاف ورزی کی صورت میں مونیٹائزیشن کی سہولت محدود یا معطل کی جا سکتی ہے۔
نئی پالیسی کو سوشل میڈیا کریئیٹرز کے لیے ایک مثبت پیش رفت قرار دیا جا رہا ہے، جس سے چھوٹے اور ابھرتے ہوئے کانٹینٹ تخلیق کاروں کے لیے عالمی سطح پر آمدنی کے نئے دروازے کھلنے کی توقع ہے۔
واضح رہے کہ کانٹینٹ مونیٹائزیشن کے لیے چیلنج جوائن کرنے کی یہ اپڈیٹ فیس بک کے تمام پیجز یا اکاؤنٹس پر نہیں آئی۔
