کراچی 1 جنوری 2026: معروف کاروباری شخصیت عارف حبیب نے پاکستان انٹرنیشنل ایئر لائن (پی آئی اے) کے ملازمین کیلیے اہم پیغام جاری کر دیا۔
میڈیا سے گفتگو کرتے ہوئے عارف حبیب نے کہا کہ پی آئی اے کو منافع بخش ایئر لائن بنانا اولین ترجیح ہے اس کے ملازمین کو تحفظ دیں گے، انہی ملازمین کی وجہ سے ہی دنیا کی نمبر دو کامیاب ایئر لائن بنی تھی۔
عارف حبیب نے کہا کہ ملازمین کو واضح پیغام ہے کہ ملازمت کے مستقبل کا دارومدار کارکردگی پر ہوگا، جو کارکردگی دیکھائے گا وہی پی آئی اے میں رہے گا، معاہدے کے تحت ایئر لائن کا نام تبدیل نہیں کر سکتے۔
یہ بھی پڑھیں: فوجی فرٹیلائزر کا عارف حبیب کنسورشیم میں شمولیت کا فیصلہ
انہوں نے کہا کہ ایک کروڑ چالیس لاکھ پاکستانی بیرون ملک رہتے ہیں، اوورسیز پاکستانیوں اور پاکستان میں ان کے اہل خانہ کی تعداد 7 کروڑ سے زیادہ بنتی ہے، 7 کروڑ پاکستانی ایئر لائن کا استعمال کرتے ہیں، کوشش ہوگی پاکستانی صرف پی آئی اے کے ذریعے سفر کریں۔
ان کا مزید کہنا تھا کہ پی آئی اے کو حج اور عمرہ کے حوالے سے ترجیح حاصل ہے۔
کھیلوں کے حوالے سے عارف حبیب نے کہا کہ پی آئی اے میں بھی کھیلوں کو فروغ دینا ترجیح ہے، ایئر لائن میں کھیلوں کی بحالی میں وقت لگے گا۔
