فیروزوالا : تھانہ کوٹ عبدالمالک کے علاقے میں ڈکیتی کی وارداتوں میں دن بہ دن اضافہ ہورہا ہے، مسلح ڈاکوؤں نے ڈاکٹر کے اہل خانہ کو یرغمال بنا کر لوٹ لیا۔
اس حوالے سے فیروزوالہ پولیس کا کہنا ہے کہ فضل حق گارڈن میں ڈاکٹر رضوان کے گھر میں ڈکیتی کی واردات ہوئی ہے۔
پولیس کے مطابق ڈاکو گھر سے1کروڑ 20لاکھ روپے کیش لوٹ کر فرار ہوگئے، ڈاکو مٹھائی دینے کے بہانے گھر کے اندر داخل ہوئے اور بچوں کو یرغمال بنا کر واردات کی۔
پولیس حکام کے مطابق یہاں دلچسپ بات یہ ہے کہ واردات کے بعد ڈاکو واپس جاتے ہوئے اپنا موبائل فون گھر میں ہی بھول گئے، تھانہ کوٹ عبدالمالک پولیس نے موبائل فون قبضے میں لے کر واردات کی تفتیش شروع کردی ہے۔
متاثرہ خاندان نے علاقہ پولیس پر الزام عائد کیا ہے کہ تمام تر شواہد دینے کے باوجود ملزمان کیخلاف کوئی کارروائی نہیں کی جارہی اور نہ ہی اب تک واقعے کا مقدمہ درج کیا گیا ہے۔
