لاہور : وزیراعظم اور صدر مملکت کے درمیان ہونے والی ملاقات کے بعد پیپلزپارٹی اور ن لیگ کے بڑوں کی بیٹھک کے اثرات سامنے آنے لگے۔
اس حوالے سے ذرائع کا کہنا ہے کہ ن لیگ کی قیادت پنجاب کے اہم مسائل پر پیپلزپارٹی کے ساتھ بات چیت پر رضامند ہوگئی۔
اس سلسلے میں پی پی اور ن لیگ کی پنجاب کے معاملے پر اہم ملاقات طے پاگئی، دونوں جماعتوں کے رہنماؤں کی ملاقات آج ہو گی۔
ذرائع کے مطابق پی پی اور ن لیگ کی ملاقات کیلئے مقام اور وقت کا تعین آج صبح ہو گا، ملاقات میں پیپلزپارٹی کے پنجاب سے متعلق تحفظات زیر غور آئیں گے۔
پنجاب میں پیپلزپارٹی کو درپیش مسائل اور حل پربات چیت ہوگی، پنجاب پاور شیئرنگ فارمولے پر ہونے والی پیش رفت پر غور اور پنجاب سے متعلق طے شدہ نکات پر پیش رفت پر بات ہو گی۔
یاد رہے کہ صدر، وزیراعظم کی ملاقات میں پنجاب کے ایشوز پر مذاکرات کا فیصلہ ہوا تھا، پیپلزپارٹی کو پنجاب میں نظر انداز کئے جانے پر شدید تحفظات ہیں۔
پی پی کو پنجاب پاور شیئرنگ فارمولے پرعملدرآمد نہ ہونے پر تحفظات ہیں، وزیراعظم نے پنجاب میں تحفظات دور کرنے کی یقین دہانی کرائی ہے۔
