بالی ووڈ کے ورسٹائل اداکار نواز الدین صدیقی نے 25 سال بعد تھیٹر میں واپسی کا اعلان کردیا ہے۔
نیشنل ایوارڈ یافتہ بھارتی اداکار نواز الدین صدیقی اب اسی میڈیم کا رخ کرنے والے ہیں جہاں سے ان کے اداکاری کے سفر کا آغاز ہوا تھا۔
اسٹیج سے تقریباً 25 سال دور رہنے کے بعد نواز الدین صدیقی ڈرامے “نقاب” کے ذریعے تھیٹر میں اپنی طویل عرصے بعد واپسی کررہے ہیں جو ان کے کیریئر میں ایک اہم اور انتہائی ذاتی سنگِ میل کی حیثیت رکھتا ہے۔
نواز الدین کی تھیٹر میں واپسی اس فن کے ساتھ ان کے دیرینہ تعلق کی عکاسی کرتی ہے جس نے ان کی کامیابی کی بنیاد رکھی تھی۔
اداکار نے کہا کہ تھیٹر وہ جگہ ہے جہاں میں نے بطور اداکار خود کو پہچانا اس میڈیم نے مجھے ایمانداری، صبر اور اپنے فن کے علاوہ کچھ بھی پاس نہ ہونے کے باوجود ناظرین کے سامنے کھڑے ہونے کا حوصلہ سکھایا، تقریباً 25 سال بعد اسٹیج پر واپس آنا بالکل ایسا ہی ہے جیسے گھر واپس آنا ہے۔
یہ پڑھیں: نواز الدین صدیقی نے بالی ووڈ کا اصل چہرہ بے نقاب کردیا
’نقاب‘ میں نواز الدین اپنی بیٹی کے ساتھ پرفارم کریں گے جو اداکاری کی دنیا میں ڈیبیو کررہی ہیں۔
انہوں نے کہا کہ جو چیز تھیٹر میں واپسی کو جذباتی بناتی ہے وہ یہ ہے کہ میں اپنی بیٹی کے ساتھ اسٹیج شیئر کروں گا کیونکہ وہ اپنے اداکاری کے سفر کا آغاز کر رہی ہے۔ ایک باپ کے طور پر اس سے زیادہ فخر کا کوئی لمحہ نہیں ہو سکتا۔ میں صرف یہ امید کرتا ہوں کہ تماشائی اسے بھی اسی محبت اور فراخدلی سے نوازیں گے جو انہوں نے ہمیشہ مجھے دکھائی ہے۔
Lifestyle News – Latest Entertainment News, Celebrity Gossip
نواز الدین نے کہا کہ ’نقاب‘ سسپنس، مزاح اور سرپرائزز سے بھرپور کہانی ہے اور میں ایک بار پھر سب کے ساتھ لائیو تھیٹر کے جادو کا تجربہ کرنے کے لیے مزید انتظار نہیں کر سکتا۔
