کھیل کے میدان میں ہارٹ اٹیک سے اموات کی تعداد بڑھتی جارہی ہے خصوصاً نوجوان کی موت کے دلخراش واقعات پر گہری تشویش پائی جاتی ہے۔
تازہ واقعہ بھارت میں پیش آیا جہاں 22 سالہ نوجوان کرکٹ کھیلتے ہوئے ہارٹ اٹیک کے باعث انتقال کر گیا۔ اس اچانک موت پر اہل خانہ اور ساتھی کرکٹرز انتہائی رنجیدہ ہیں۔
انڈین میڈیا کے مطابق ریاست اترپردیش میں حافظ تھانہ گنج کے حدود میں ثاقب نامی نوجوان دل کا دورہ پڑنے سے اس وقت چل بسا جب وہ دوستوں کے ساتھ کرکٹ کھیل رہا تھا۔
ثاقب بی ایڈ کا طالبعلم تھا اور عید کی چھٹیاں منانے گھر آیا ہوا تھا جہاں جمعہ کے روز میچ کھیلتے ہوئے اسے سانس لینے میں دشواری کا سامنا کرنا پڑا اور چند لمحوں بعد وہ زمین پر گر گیا۔
طبیعت بگڑنے پر ساتھیوں نے اسے فوری طور پر اسپتال منتقل کیا لیکن وہ جانبر نہ ہو سکا اور موت کے منہ میں چلا گیا۔
اہل خانہ کا کہنا ہے کہ ثاقب سبھی کا لاڈلا تھا اور بچپن سے ہی کرکٹ کھیلنے کا شوقین تھا۔ متوفی مقامی طور پر ہونے والے ٹورنامنٹس میں حصہ لیتا تھا۔
