قطر مذاکرات : پاکستان اور افغانستان جنگ بندی پر راضی ہوگئے

دوحہ : قطری وزارت خارجہ نے اعلان کیا ہے کہ پاکستان اور افغانستان جنگ بندی پر راضی ہوگئے ہیں۔ قطری وزارت خارجہ کے مطابق جنگ بندی کا فیصلہ دوحہ میں ہونے والے مذاکرات کے دوران ہوا۔

قطری وزارت خارجہ کے اعلامیہ کے مطابق دوحہ میں پاکستان اور افغانستان کے درمیان مذاکرات 13گھنٹے تک جاری رہے، مذاکرات کے دوران فریقین نے دو طرفہ امن و استحکام کے لیے مستقل طریقہ کار وضع کرنے پر بھی اتفاق کیا۔

دونوں ممالک آئندہ چند دنوں میں فالو اپ اجلاس منعقد کریں گے، فالو اپ اجلاس میں جنگ بندی کے نفاذ اور اس کے پائیدار تسلسل کو یقینی بنایا جاسکے گا۔

Statement | Pakistan and Afghanistan Agree to an Immediate Ceasefire During a Round of Negotiations in Doha#MOFAQatar pic.twitter.com/fPXvn6GaU6

— Ministry of Foreign Affairs – Qatar (@MofaQatar_EN) October 18, 2025

قطری وزارت خارجہ کے اعلامیہ میں کہا گیا ہے کہ یہ اقدامات دونوں برادر اسلامی ممالک کی سلامتی اور استحکام کے فروغ میں مددگار ثابت ہونگے۔

اعلامیہ کے مطابق یہ اقدامات سلامتی اور استحکام کے فروغ میں مددگار ثابت ہونگے، یہ اہم پیشرفت سرحدی کشیدگی کے خاتمے اور خطے میں پائیدار امن کے قیام کی بنیاد رکھے گی۔

قطر اور ترکیہ کے تعاون پر شکر گزار ہیں، خواجہ آصف

اس حوالے سے وزیردفاع خواجہ آصف نے سماجی رابطے کی ویب سائٹ ایکس پر اپنے پیغام میں تصدیق کی کہ پاکستان اور افغانستان کے درمیان سیز فائر کا معاہدہ طے پا گیا ہے۔

خواجہ آصف نے کہا کہ افغانستان سے دہشت گردی کا سلسلہ پاکستان میں فوری بند ہوگا، دونوں ہمسایہ ممالک اپنی سرزمین کا مکمل احترام کریں گے۔

پاکستان اور افغانستان کے مابین سیز فائر کا معاہدہ طے پاگیا۔ پاکستان کی سرزمین پہ افغانستان سے دھشت گردی کا سلسلہ فی الفور بند ھوگا۔ دونوں ھمسایہ ملک ایک دوسرے کی سرزمین کا احترام کریں گے الحمدوللہ
25اکتوبر کو استنبول میں دوبارہ وفود میں ملاقات ھو گی۔ اور تفصیلی معاملات بات ھوگی۔… pic.twitter.com/OKNbRuXEPU

— Khawaja M. Asif (@KhawajaMAsif) October 18, 2025

انہوں نے بتایا کہ 25اکتوبر کو استنبول میں دوبارہ وفود کی ملاقات ہوگی، قطر اور ترکیہ کے اس تعاون پر پاکستان اور افغانستان ان کے شکر گزار ہیں۔