راولپنڈی : تھانہ دھمیال کے علاقہ گرجا میں سات سالہ بچی کی لاش قبر سے مبینہ طور پر غائب ہونے کے معاملے کی اصل حقیقت سامنے آگئی۔
تفصیلات کے مطابق راولپنڈی میں تھانہ دھمیال کے علاقے گرجا روڈ قبرستان میں سات سالہ بچی علینہ کی قبر سے لاش مبینہ طور پر غائب ہونے کے معاملے پر سماعت ہوئی۔
عدالت نے والد کی درخواست منظور کرتے ہوئے بچی کی قبر کشائی کے احکامات جاری کیے اور پولیس سمیت میڈیکل بورڈ کو تمام انتظامات یقینی بنانے کی ہدایت دی۔
جوڈیشل مجسٹریٹ سید علی جواد نقوی کی موجودگی میں قبر کشائی کا عمل شروع کیا گیا، جس کے دوران ڈاکٹرز، قبرستان انتظامیہ اور عدالتی عملہ موقع پر موجود رہا، جبکہ قبرستان کے اطراف اضافی سیکیورٹی بھی تعینات کی گئی۔
مزید پڑھیں : راولپنڈی : قبر سے 7 سالہ بچی کی میت غائب
گرجا روڈ قبرستان میں قبرکشائی مکمل کیا گیا تو بچی کی لاش قبر میں ہی موجود نکلی تاہم قبر کشائی کے بعدبچی کی دوبارہ تدفین کر دی گئی۔
یاد رہے والد نے قبر کے قریب سے کفن ملنے پر لاش غائب ہونے کے خدشے کا اظہار کیا تھا اور درخواست دائر کی تھی۔
جس میں کہنا تھا کہ ان کی بیٹی علینہ 26 اگست کو وفات پا گئی تھی اور تدفین کے بعد جب وہ دعا کے لیے دوبارہ قبرستان گئے تو بچی کا کفن قبر کے باہر پڑا ملا، اس پر انہوں نے عدالت سے رجوع کیا۔
