ویسے تو انجیر پورا سال ہی دستیاب ہوتی ہے لیکن سردیوں میں اس کے استعمال میں نمایاں اضافہ ہوجاتا ہے، جس کی بڑی وجہ اس کے بےشمار فوائد ہیں۔
انسان کیلئے قدرت کی بنائی گئی بے شمار نعمتوں میں بہت سے میوہ جات میں انجیر بھی شامل ہے جسے جنت کا پھل بھی کہا جاتا ہے، اس کے کئی ایسے طبی فوائد ہیں جسے جان کر آپ بھی حیران رہ جائیں گے۔
اے آر وائی ڈیجیٹل کے پروگرام گڈ مارننگ پاکستان میں ڈاکٹر عائشہ عباس نے انجیرکے بیش بہا فوائد بیان کیے اور اس کی اہمیت پر روشنی ڈالی۔ آپ بھی اس کے فوائد جان کر آپ اسے باقاعدگی سے استعمال کرنے پر مجبور ہوجائیں گے۔
انہوں نے بتایا کہ دو دانے انجیر کو ایک پیالی پانی میں رات کو بھگو دیں اور صبح نہار منہ کھا کر اس کا پانی بھی پی لیں، اسے روزانہ استعمال کریں، جس سے قبض جڑ سے ختم ہو جائے گی۔
ان کا کہنا تھا کہ بھگوئے ہوئے انجیر جسم میں توانائی بحال کرنے، نظامِ ہاضمہ کو بہتر بنانے اور کئی بیماریوں سے بچاؤ میں بھی مدد دیتے ہیں۔
انجیر میں فائبر کی وافر مقدار پائی جاتی ہے جو قبض کے مسئلے کو ختم کرتی ہے اور آنتوں کی صفائی میں مدد دیتی ہے، رات بھر بھگوئے جانے سے انجیر نرم ہو جاتا ہے، جس سے اس کے غذائی اجزاء جسم میں زیادہ آسانی سے جذب ہوتے ہیں۔
انجیر میں قدرتی شکر موجود ہونے کے باوجود اس میں چکنائی نہ ہونے کے برابر ہوتی ہے۔ بھگوئے ہوئے انجیر بھوک پر قابو رکھتے ہیں، جس سے وزن گھٹانے میں مدد ملتی ہے۔
یاد رہے کہ ذیابطیس کے مریضوں یا وہ افراد جنہیں بلڈ شوگر کے مسائل ہیں، انہیں انجیر کھانے سے قبل اپنے معالج سے لازمی مشورہ کرنا چاہیے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نوٹ : مندرجہ بالا تحریر معالج کی عمومی رائے پر مبنی ہے، کسی بھی نسخے یا دوا کو ایک مستند معالج کے مشورے کا متبادل نہ سمجھا جائے۔
