سعودی عرب، قطر اور ترکیہ نے پاکستان اور افغانستان کے درمیان ہونے والے جنگ بندی کے معاہدے کا خیر مقدم کیا ہے۔
اس حوالے سے سعودی وزارتِ خارجہ نے اپنے بیان میں کہا ہے کہ سعودی حکومت تمام علاقائی اور بین الاقوامی کوششوں کی حمایت کا اعادہ کرتی ہے جو امن و استحکام کے فروغ کے لیے کی جا رہی ہیں۔
وزارت خارجہ کا کہنا ہے کہ امید ہے کہ دونوں ممالک کے درمیان سرحدی کشیدگی کے خاتمے کا یہ اقدام پائیدار امن کی راہ ہموار کرے گا۔
اس کے علاوہ قطری وزارتِ خارجہ نے اپنے بیان میں کہا ہے کہ جنگ بندی دونوں ممالک کے درمیان سرحدی کشیدگی کا خاتمہ کرے گی اور خطے میں پائیدار امن کے قیام کی مضبوط بنیاد فراہم کرے گی۔
دوسری جانب ترک وزارت خارجہ کا کہنا ہے کہ ترکیہ دونوں ملکوں کے درمیان امن اور خطے میں استحکام کے قیام کی کوششوں کی حمایت جاری رکھے گا۔
واضح رہے کہ پاکستان اور افغانستان نے فوری جنگ بندی پر اتفاق کیا ہے، وزیر دفاع خواجہ آصف کا کہنا ہے کہ افغانستان سے پاکستان کی سرزمین پر دہشت گردی فوری بند ہوگی۔ انہوں نے کہا کہ دونوں ممالک ایک دوسرے کی سرزمین کا احترام کریں گے۔
