وزیر دفاع خواجہ آصف نے بھارتی فوجی و سیاسی قیادت کے اشتعال انگیز بیانات پر اپنے شدید رد عمل کا اظہار کرتے ہوئے منہ توڑ جواب دے دیا۔
سناجی رابطے کی ویب سائٹ ایکس پر اپنے پیغام میں انہوں نے کہا ہے کہ اس بار بھارت ان شاءاللہ اپنے طیاروں کے ملبے میں دفن ہوگا۔
وزیر دفاع خواجہ آصف نے کہا کہ بھارتی فوجی و سیاسی قیادت کے بیانات اپنی ساکھ بحال کرنے کی ناکام کوشش ہے، گزشتہ تنازع میں نتیجہ0-6 رہا جس سے بھارت کی ساکھ متاثر ہوئی۔
بھارتی فوجی اور سیاسی قیادت کے بیانات اپنی خاک میں ملی ساکھ کو بحال کرنے کی ناکام کوشش ھے۔ اتنی فیصلہ کن شکست کے بعد جس کا سکور 0-6 رہا ھو اگر دوبارہ کوشش کی تو سکور انشاءاللہ پہلے سے کہیں بہتر ھوگا۔ جسطرح بھارت میں عوامی رائے تاریخ کی بد ترین شکست کے بعد حکومت کے خلاف ھوئ اور…
— Khawaja M. Asif (@KhawajaMAsif) October 4, 2025
ان کا کہنا تھا کہ گزشتہ ماہ مئی میں بدترین شکست کے بعد بھارت میں عوامی رائے حکومت کے خلاف ہوئی، مودی اور اس کا ٹولہ اپنی ساکھ کھو بیٹھا، جس کا دباؤ لیڈر شپ کے بیانات سے ظاہر ہورہا ہے۔
خواجہ آصف نے کہا کہ پاکستان اللہ کے نام پر قائم ہوا ہے، ہمارے محافظ اللہ کے سپاہی ہیں، بھارت نے اگر دوبارہ کوشش کی تو اسکور ان شااللہ پہلے سے کہیں بہتر ہوگا۔
مزید پڑھیں : بھارت نے نیا ڈرامہ کیا تو پاکستان کا ردعمل تباہ کن ہوگا، آئی ایس پی آر
یاد رہے کہ اس سے قبل افواج پاکستان نے بھی بھارتی سیکیورٹی اسٹیلشمنٹ کی ہرزہ سرائی پر سخت ردعمل دیتے ہوئے کہا کہ بھارت نے نیا ڈرامہ کرنے کی کوشش کی تو پاکستان کا ردعمل تباہ ہوگا۔
پاک فوج کے شعبہ تعلقات عامہ (آئی ایس پی آر) کا کہنا ہے کہ بھارتی اسٹیبلشمنٹ کے بیانات غیر ذمہ دارانہ ہیں، متنبہ کرتے ہیں اگر کوئی ایڈونچر کیا گیا تو بھرپور جواب دیں گے۔
ترجمان پاک فوج کا کہنا ہے کہ جنوبی ایشیا میں امن و استحکام کے لیے ہرزہ سرائی کے سنگین نتائج برآمد ہوسکتے ہیں، بھارت کئی دہائیوں سے مظلومیت کا کارڈ کھیل رہا ہے۔
