کراچی : دنیا بھر کی ٹیکسٹائل کمپنیاں اگلے ماہ جرمنی کے شہر فرینکفرٹ میں منعقد ہونے والی دو اہم بین الاقوامی نمائشوں ٹیک ٹیکسٹائل اور ٹیکس پروسیس 2026 میں اکٹھی ہوں گی۔
یہ نمائشیں تکنیکی ٹیکسٹائل اور گارمنٹس پروسیسنگ کے شعبوں میں دنیا کی نمایاں ترین تقریبات میں شمار ہوتی ہیں، جن میں 49 ممالک سے 1 ہزار 700 سے زائد نمائش کنندگان شرکت کریں گے، جس میں سے 1 ہزار 500 سے زائد ٹیک ٹیکسٹائل جبکہ تقریباً 200 ٹیکس پروسیس میں شامل ہوں گے۔
اس سال کی نمائشوں میں عملی نوعیت کی جدتوں پر خصوصی توجہ دی جائے گی، جہاں ورک ویئر، حفاظتی لباس، اسمارٹ فیشن اور اسپورٹس ویئر کے لیے جدید مواد پیش کیے جائیں گے۔
اس کے ساتھ ساتھ کمپنیاں یہ بھی اجاگر کریں گی کہ وہ کس طرح پائیدار حل، نئی ٹیکنالوجیز اور بہتر پیداواری طریقوں کے ذریعے صنعتی چیلنجز کا مقابلہ کر رہی ہیں۔
پاکستان اس نمائش میں نمایاں شرکت کرے گا، جہاں ٹریڈ ڈیولپمنٹ اتھارٹی آف پاکستان (ٹڈاپ) کے تحت 4کمپنیاں حصہ لے رہی ہیں۔
ان نمائشوں میں بڑی تعداد میں بین الاقوامی شرکاء کی شرکت متوقع ہے، 2024 کے ایڈیشن میں ٹیک ٹیکسٹائل اور ٹیکس پروسیس نے مشترکہ طور پر 63 ہزار سے زائد زائرین کو متوجہ کیا، جو ان کی حیثیت کو ٹیکسٹائل صنعت کے لیے ایک اہم سورسنگ اور نیٹ ورکنگ پلیٹ فارم کے طور پر اجاگر کرتا ہے۔
