راولپنڈی (11 جنوری 2026): پاک بحریہ کے فلوٹیلا نے عمان کی بندرگاہ سلطان قابوس مسقط کا دورہ کیا، اس میں پی این ایس راہ نورد، پی این ایس مددگار اور پاکستان میری ٹائم سکیورٹی ایجنسی کا جہاز پی ایم ایس ایس کشمیر بھی شامل رہا
فوج کے شعبہ تعلقات عامہ (آئی ایس پی آر) کے مطابق عمان کی بندرگاہ سلطان قابوس پہنچنے پر عمانی حکام کی جانب سے جہازوں کا پرتپاک استقبال کیا گیا۔
یہ بھی پڑھیں: پاک بحریہ کی ہنگور کلاس آبدوز ’غازی‘ چین میں لانچ
دورے کے دوران مشن کمانڈر نے کمانڈنگ آفیسرز کے ہمراہ عمان کی بحریہ کی قیادت سے ملاقاتیں کیں، مشن کمانڈر نے رائل نیوی آف عمان کے قائم مقام کمانڈر، ڈی جی آپریشنز اینڈ پلانز، کمانڈر میری ٹائم سکیورٹی سینٹر، کمانڈر سید بن سلطان نیول بیس اور کمانڈنٹ سلطان قابوس نیول اکیڈمی سے ملاقاتیں کیں۔
آئی ایس پی آر کے مطابق پورٹ کال کے بعد پاک بحریہ کے جہازوں نے رائل عمان نیوی کے جہاز کے ساتھ پاسیج کی مشق کی، سمندر میں مشق کا مقصد دونوں بحری افواج کے درمیان باہمی تعاون کو بڑھانا اور بحری مشقوں کے دو طرفہ انعقاد کے ذریعے ایک دوسرے کے تجربات سے استفادہ کرنا تھا۔
