بالی ووڈ اداکارہ عالیہ بھٹ کی اسکرین ایوارڈز میں میزبانی کو ناقدین نے ’اوور ایکٹنگ‘ قرار دے دیا۔
بھارتی میڈیا رپورٹ کے مطابق اداکارہ عالیہ بھٹ نے اسکرین ایوارڈز 2026 میں کامیڈین ذاکر خان اور اداکار سنیل گروور کے ساتھ میزبانی کی۔
سوشل میڈیا پر تبصروں سے ظاہر ہوتا ہے کہ ناظرین کو ان کی میزبانی پسند نہیں آئی۔
ایوارڈ شو میں ان کی پیشکش کی متعدد ویڈیوز سوشل میڈیا پر سامنے آئی ہیں، جن میں سے ایک ویڈیو میں وہ سنجے لیلا بھنسالی، موہت سوری اور آدتیہ دھر کے بارے میں بات کرتی نظر آرہی ہیں۔
سوشل میڈیا صارفین نے ان کی میزبانی پر اپنی رائے کا اظہار اس وقت شروع کیا جب شو کے کلپس انٹرنیٹ پر گردش کرنے لگے۔ کچھ ناظرین نے مشاہدہ کیا کہ ان کے لطیفے کامیاب نہ ہو سکے کیونکہ حاضرین نے خاموشی سے جواب دیا، جس سے ثابت ہوا کہ ان کی حسِ مزاح اثر نہ دکھا سکی۔
ایک سوشل میڈیا صارف نے لکھا، “مہمانوں کے تاثرات بالکل سپاٹ تھے،” جبکہ ایک اور نے ذکر کیا، “وہ پراعتماد نظر نہیں آ رہی تھیں۔
ایک صارف نے لکھا کہ ’کامیڈی ٹائمنگ منفی صفر ہے۔‘ ایک اور نے لکھا کہ ’اوور ایکٹنگ کی ہے ہر کوئی الجھن کا شکار نظر آرہا ہے۔‘
کسی نے لکھا کہ وہ پرینکا چوپڑا کی نقل کر رہی ہے۔ پرینکا چوپڑا ان برسوں میں شاہ رخ خان کے ساتھ ایک ماہر کی طرح اینکرنگ کیا کرتی تھیں۔
