سعودی عرب میں محکمہ موسمیات کا کہنا ہے کہ آج مکہ مکرمہ اور مدینہ منورہ سمیت نجران، جازان، عسیر اور الباحہ میں کہیں درمیانے درجے کی اور کہیں تیز بارش کا امکان موجود ہے۔
سعودی خبر رساں ادارے کی رپورٹ کے مطابق محکمے کا کہنا تھا کہ ’تیز بارش کے ساتھ گرج چمک ہوگی جبکہ نشیبی علاقوں میں سیلابی ریلوں کا بھی خدشہ ہے‘۔
محکمے کے مطابق ’مشرقی ریجن، ریاض اور حائل کے بعض علاقوں کے علاوہ قصیم میں کہیں کہیں ہلکی بارش کا امکان ہے۔
ملک کے ساحلی علاقوں میں مطلع گرد آلود رہے گا جبکہ مغرب میں بالائی علاقوں میں آج دھند چھائی رہے گی۔
محکمے کے مطابق ’عسیر، جازان میں موسلادھار جبکہ نجران میں درمیانے درجے کی بارش کا امکان ہے‘۔
سعودی عرب میں محکمہ موسمیات نے بتایا کہ ’مکہ مکرمہ شہر کے علاوہ جموم، القنفذہ، اللیث اور قرب وجوار میں ہلکی بارش کا امکان ہے، جبکہ طائف، کامل، العرضیات اور قرب وجوار میں گرج چمک کے ساتھ تیز بارش ہوسکتی ہے‘۔
مدینہ منورہ میں موسلا دھار بارش، زائرین کی دعائیں (ویڈیو)
بیان کے مطابق مدینہ منورہ شہر کے علاوہ بدر، الحناکیہ، المہد اور وادی الفرع میں دوپہر دو بجے سے شام 9 بجے تک بارش کا امکان ہے جبکہ ینبع اور الرایس میں غبار ہوگا۔
