والدین کی اکثریت بچوں کیلیے صحت مند کھانا کھلانے کی جدوجہد ایک مشکل جنگ معلوم ہوتی ہے، ایسا لگتا ہے کہ بچے کسی بھی سبزی یا غذائیت سے بھرپور خوراک سخت ناپسند کرتے ہیں۔
اس حوالے سے ماہرین غذائیت کا کہنا ہے کہ بچوں میں اچھی کھانے کی عادات ڈالنے کے لیے انہیں اپنے ساتھ کھانے کے عمل میں شامل کریں اور ان میں رغبت پیدا کرنے کیلیے مختلف اور رنگ برنگے پسندیدہ کھانے مختلف صورتوں میں پیش کریں۔
اے آر وائی ڈیجیٹل کے پروگرام گڈ مارننگ پاکستان میں امریکا میں مقیم خاتون ساجدہ انعام نے بتایا کہ کس طرح انہوں نے دیار غیرمیں رہ کر اپنے بچوں کو وہاں کے کھانوں کے ساتھ پاکستانی ڈشیں کھانے کی عادت ڈالی۔ ان کا کہنا تھا کہ ان کے گھر میں ایک وقت کا کھانا پاکستانی انداز سے بنتا تھا جس سے بچوں کو کھانے کی عادت پڑی۔
بزنس وومن نوشین برکت نے بتایا کہ میری چھوٹی بیٹی بھی انڈا یا دیگر طاقتورغذائیں نہیں کھاتی تھی تو میں نے اس کا طریقہ یہ نکالا کہ وہ چیزیں جو پسند کرتی تھی ان میں انڈا، نٹس کا پاؤڈریا گندم وغیرہ ڈال کر مختلف شیپس میں بنا کر کھلاتی تھی۔
ماہر غذائیت ڈاکٹر سدرہ رضا کا کہنا تھا کہ بچے کی ماں پہلے خود سے یہ سوال کرے کہ کیا وہ بھی وہی سبزی شوق سے کھاتی تھیں یا کھاتی ہیں جو وہ اپنے بچے کو کھلانا چاہ رہی ہے؟ انہوں نے کہا کہ گر کوئی بچہ پاستا شوق سے کھاتا ہے اور اسے آپ نے پروٹین والی غذا دینی ہے تو اسے قیمہ پاستا یا لزانیہ بنا کر دیں۔ اس کے علاوہ سبزیاں کھانے کی عادت بھی اسی طرح ڈالیں۔
انہوں نے کہا کہ پہلے دو سال تک بچوں کو گھر میں پکی ہوئی سبزیاں تھوڑی تھوڑی سی مقدار میں کھلائیں تاکہ بڑے ہوکر اسے یہ چیزیں کھانے میں دشواری نہ ہو یا اس کا ذہن اسے قبول نہ کرے۔
ان کا مزید کہنا تھا کہ بچوں کے ساتھ زبردستی نہ کریں اور کھانے کا ایک منظم شیڈول بنائیں، ان کی پسند اور ناپسند کو سمجھیں، اور صحت بخش متبادل فراہم کریں، ساتھ ہی اسے موبائل فون یا ٹی وی اسکرین سے دور رکھ کر اس کے کھانے پر توجہ دیں۔
