لاہور : پاکستان کے مایہ ناز بلے باز اور سابق کپتان بابر اعظم نے ٹی ٹوئنٹی کرکٹ میں ایک اور شاندار سنگِ میل عبور کرلیا۔
انہوں نے بھارتی اسٹار روہت شرما کے بعد اب ویرات کوہلی کا سب سے زیادہ نصف سنچریاں بنانے کا ریکارڈ توڑ کر تاریخ میں نیا باب رقم کر دیا۔
یہ تاریخی لمحہ لاہور میں جنوبی افریقا کے خلاف جاری تین میچوں کی ٹی ٹوئنٹی سیریز کے تیسرے اور آخری میچ کے دوران پیش آیا، جہاں بابر اعظم نے 36 گیندوں پر 51 رنز کی عمدہ اننگز کھیل کر اپنی 40 ویں نصف سنچری مکمل کی۔
اس کارکردگی کے ساتھ ہی انہوں نے ویرات کوہلی کو پیچھے چھوڑ دیا، جنہوں نے 39 نصف سنچریاں اسکور کی تھیں۔
@babarazam258 notches his 4️⃣0️⃣th fifty-plus score in T20Is – most for any batter in the format #PAKvSA | #GreenPeYaqeen | #BackTheBoysInGreen pic.twitter.com/KGAkUuQoU1
— Pakistan Cricket (@TheRealPCB) November 1, 2025
قابلِ ذکر بات یہ ہے کہ بابر اعظم گزشتہ سال دسمبر میں جنوبی افریقا کے خلاف سیریز کے بعد ٹی ٹوئنٹی اسکواڈ سے باہر تھے۔
تاہم ایشیا کپ 2025 میں ٹیم کی ناکامی کے بعد سلیکٹرز نے انہیں دوبارہ موقع دیا اور بابر نے واپسی پر شاندار انداز میں اپنی فارم کا ثبوت دیتے ہوئے ریکارڈ اپنے نام کرلیا۔
تجزیہ کاروں کا کہنا ہے کہ بابر اعظم کی یہ کارکردگی نہ صرف ان کے اعتماد کی بحالی کا اشارہ ہے بلکہ پاکستانی بیٹنگ لائن کے لیے ایک مثبت علامت بھی ہے۔
کرکٹ شائقین نے بھی بابر کی اس کامیابی کو بھرپور سراہا اور سوشل میڈیا پر مبارکباد کے پیغامات کی بھرمار کر دی۔
مزید پڑھیں : پاکستان نے جنوبی افریقا کو ہرا کر ٹی 20 سیریز جیت لی
پاکستان نے جنوبی افریقا کو تیسرے ٹی 20 میچ میں 4 وکٹوں سے شکست دے کر ٹی 20 سیریز 2-1 سے اپنے نام کرلی۔
قذافی اسٹیڈیم لاہور میں کھیلے گئے میچ میں پاکستان نے جنوبی افریقا کی جانب سے دیا جانے والا 140 رنز کا ہدف 6 وکٹوں کے نقصان پر 19 اوورز میں حاصل کرلیا، بابر اعظم کو میچ اور فہیم اشرف کو سیریز کا بہترین کھلاڑی قرار دیا گیا۔
بابر اعظم نے 47 گیندوں پر 68 رنز کی میچ وننگ اننگز کھیلی، کپتان سلمان علی آغا 33 اور صاحبزادہ فرحان نے 19 رنز بنائے، محمد نواز بغیر کوئی رن بنائے آؤٹ ہوئے، حسن نواز نے 5رنز بنائے، اوپنر صائم ایوب بغیر کوئی رن بنائے پویلین لوٹ گئے۔
