کراچی : شہر قائد میں ایک اور بچہ اندھی گولی کا نشانہ بن گیا، اورنگی ٹاؤن کی فقیر کالونی میں نامعلوم سمت سے گولی آئی اور چھ سالہ بچے کی جان لے گئی۔
اے آر وائی نیوز کی رپورٹ کے مطابق کراچی کے علاقے اورنگی ٹاؤن فقیر کالونی میں نامعلوم سمت سے گولی لگنے کے باعث چھ سالہ رضوان جاں بحق ہو گیا۔
بچے کے والد کا کہنا ہے کہ رضوان اپنی والدہ کے ساتھ خالہ کے گھر جانے کے لئے نکلا اور نامعلوم سمت سے آنے والی گولی کا نشانہ بن گیا۔
جان بحق ہونے والے بچے کو پہلے نجی ہسپتال اور پھر سول ہسپتال منتقل کیا گیا جہاں قانونی کاروائی کے بعد لاش ورثاء کے حوالے کر دی گئی۔
پولیس حکام کا کہنا ہے کہ علاقے میں ملزمان کی گرفتاری کیلیے کارروائی جاری ہے ہوائی فائرنگ کی زد میں آکر بچہ جاں بحق ہوا۔ واقعے میں ملوث ملزمان کو گرفتار کرکے ان کے خلاف قانونی کاروائی کی جائے گی۔
مزید پڑھیں : گھر میں کھیلتی بچی اندھی گولی لگنے سے جاں بحق
اس سے قبل گزشتہ ماہ لیاری موسیٰ لین میں گھر کی چھت پر کھیلنے والی ڈھائی سالہ ننھی بچی اندھی گولی لگنے سے جاں بحق ہو گئی تھی۔
ریسکیو حکام کا کہنا ہے کہ متوفیہ بچی بلڈنگ کی ساتویں منزل پر رہائش پذیر اور چھت پر کھیل رہی تھی کہ نامعلوم سمت سے آنے والی گولی بچی کے سر میں لگی جس سے وہ موقع پر ہی جاں بحق ہوئی۔
