شدید سردی نے دیگر صوبوں کی طرح سندھ کو بھی اپنی لپیٹ میں لیا ہوا ہے، گورکھ ہل میں برفباری ہوئی جس سے پارہ منفی ہوگیا۔
اے آر وائی نیوز کے مطابق دادو میں گورکھ ہل میں برفباری ہوئی جس کے باعث پارہ نقطہ انجماد سے گرگیا، برف باری کے باعث سندھ کے اس علاقے میں سردی کی شدت میں کافی اضافہ ہوگیا اور وہاں پارہ منفی 4 ہوچکا ہے۔
گورکھ ہل جو کہ سندھ کا تفریحی مقام ہے وہاں برفباری نے منظر بدل دیا اور ہر طرف برف کے چھوٹے چھوٹے اولے نظر آنے لگے جبکہ مقامی لوگ اس سے لطف اندوز ہوتے پائے گئے۔
ملک کے مختلف شہروں میں موسم گزشتہ تین چار دنوں سے کافی سرد ہوگیا ہے جبکہ کراچی میں بھی پارہ سنگل ڈیجیٹ میں ریکارڈ کیا گیا۔
