کراچی : سانحہ گل پلازہ پر جوڈیشل کمیشن کے قیام کا معاملے میں اہم پیش رفت سامنے آئی ہے، گورنر سندھ کامران ٹیسوری نے چیف جسٹس سندھ ہائیکورٹ کو خط لکھ دیا۔
گورنرسندھ نے اپنے خط میں گل پلازہ میں آگ لگنے کے واقعے پر عدالتی انکوائری کی درخواست کرتے ہوئے گُل پلازہ آگ لگنے کے واقعے پرجوڈیشل انکوائری کمیشن قائم کرنے کی سفارش کی ہے۔
گورنر سندھ نے شاپنگ پلازہ میں آگ لگنے سے قیمتی انسانی جانوں کے ضیاع پر شدید تشویش کا اظہار کرتے ہوئے واقعے کی وجوہات، غفلت ،قانونی خلاف ورزیوں کی تحقیقات کی درخواست کی۔
خط کے متن میں کہا گیا ہے کہ جوڈیشل انکوائری سے ذمہ داران کا تعین ممکن ہوگا، انکوائری کمیشن سندھ ہائی کورٹ کی نگرانی میں بنایا جائے۔
گورنر سندھ کامران ٹیسوری کا کہنا ہے کہ انصاف کی فراہمی اور عوامی اعتماد کی بحالی لازم ہے، مستقبل میں ایسے سانحات کی روک تھام کیلئے جامع تحقیقات کی ضرورت ہے۔
