کوئٹہ: نجی ہیلتھ سینٹر کے انکیوبیٹر سے مبینہ طور پر نومولود بچہ غائب ہونے کے بعد پولیس نے عملے کے 4 افراد کو گرفتار کرلیا۔
اے آر وائی نیوز کوئٹہ کے نمائندے عزیز الرحمان کی رپورٹ کے مطابق جناح روڈ پر واقع نجی ہیلتھ سینٹر سے مبینہ طور پر نومولود بچہ غائب ہونے کا واقعہ پیش آیا ہے۔
کلی عمر کے رہائشی نظام الدین نے 3جنوری کو بچہ انکیو بیٹر میں رکھنے کیلئے سینٹر کے حوالے کیا تھا، متاثرہ شہری کا کہنا ہے کہ سینٹر کے عملے نے آج فون کال کرکے کہا کہ اپنی بچی لے جائیں۔
متاثرہ شہری نظام الدین نے بتایا کہ میں نے نرسری عملے سے کہا کہ میں نے بچہ حوالے کیا تھا بچی نہیں۔
نرسری کے عملے نے کہا آپ کا بچہ غلطی سے کسی اور فیملی کے حوالے کردیا گیا ہے، بتائی گئی فیملی سے رابطے پر معلوم ہوا کہ وہ اپنا ہی بچہ لے گئے تھے جو بعد میں انتقال کرگیا۔
نظام الدین کا کہنا ہے کہ مجھے نہیں معلوم کہ کس کی بچی میرے حوالے کرنے کی کوشش کی جارہی ہے، سینٹر میں لگے خفیہ کیمروں کی متعلقہ تاریخ کا ریکارڈ بھی غائب کیا گیا ہے۔
بعد ازاں نومولود بچے کے ورثا کے احتجاج اور درخواست پر پولیس نے نرسری کے عملے کے 4 افراد کو گرفتار کرلیا۔
