کراچی : بھینس کالونی میں سالے نے سینے پر گولی مار کر اپنے بہنوئی کو قتل کردیا، واردات کے بعد ملزم فرار ہوگیا، مقتول نے پسند کی شادی کی تھی۔
اے آر وائی نیوز کی رپورٹ کے مطابق کراچی کے علاقہ بھینس کالونی پیرانو گوٹھ میں سالے نے فائرنگ کرکے بہنوئی کو موت کے گھاٹ اتار دیا۔ ،
پولیس کے مطابق مقتول کی شناخت 41سالہ عبداللطیف کے نام سے ہوئی ہے، مقتول نے ملزم دیدار کی بہن سے پسند کی شادی کی تھی۔
پولیس حکام کا کہنا ہے کہ مقتول عبداللطیف کو سینے پر ایک گولی لگی جو اس کی موت کی وجہ بنی، واردات کے بعد ملزم فرار ہوگیا جس کی تلاش کیلیے کارروائی کی جارہی ہے۔
مقتول بہنوئی کی لاش ضابطے کی کارروائی کے لئے اسپتال منتقل کردی گئی ہے، پوسٹ مارٹم کے بعد لاش کو لواحقین کے حوالے کردیا گیا۔
مزید پڑھیں : سالے کی فائرنگ سے بہنوئی کا دوست جاں بحق
یاد رہے کہ دو ماہ قبل بلوچستان میں غیرت کے نام پر ایک اور جوڑے کو فائرنگ کرکے قتل کردیا گیا تھا ۔ لیویز حکام کے مطابق بھائیوں نے حاملہ بہن اور بہنوئی کو پسند کی شادی کرنے پر قتل کردیا۔
ایس ایچ او لیویز تھانہ ولی خان پیر جان کے مطابق واقعہ مستونگ کے علاقے لکپاس کے قریب نوشکی کراس پر پیش آیا، جہاں مقتول محمد شعیب اور اس کی حاملہ بیوی بے نظیر کو فائرنگ کرکے قتل کردیا گیا۔
