پی ایس ایل 11 میں راولپنڈیز کے کپتان محمد رضوان نے لاہور قلندرز سے شکست کے بعد ناکامی کا اعتراف کرلیا ہے۔
لاہور قلندرز سے شکست کے بعد میڈیا سے گفتگو کرتے ہوئے راولپنڈیز کے کپتان محمد رضوان نے کہا کہ میری کارکردگی اچھی نہیں میں خود کہتا ہوں میری ٹیم میں جگہ نہیں بنتی۔
انہوں نے کہا کہ میری پرفارمنس اچھی نہیں اسی وجہ سے ٹیم بھی صحیح نہیں کھیلی، میں انسان ہوں اور شاید میری پلاننگ میں کمی تھی، مجھ میں کمی تھی تبھی اچھی کارکردگی نہ دکھا سکا، راولپنڈیز میں اس مرتبہ نوجوان کھلاڑیوں کو اوپر لانا مقصد ہے۔
یہ پڑھیں: لاہور قلندرز نے راولپنڈیز کو شکست دے کر پی ایس ایل 11 سے باہر کردیا
محمد رضوان نے کہا کہ جب ہارتے ہیں تو مثبت چیزیں لانا مشکل ہوجاتا ہے، مسلسل 7 میچ ہارنے کے بعد بھی مثبت چیزیں نکالنے کی کوشش کرتے ہیں، شاداب خان کا بیک اپ ابھی تک ہمیں نہیں مل سکا، کچھ کھلاڑی ہماری ٹیم سے مثبت انداز سے پاکستان کو مل سکتے ہیں۔
راولپنڈیز کے کپتان نے کہا کہ قسمت شاید ساتھ نہیں دے رہی، کرکٹ بائی چانس ہے ضروری نہیں نتائج ہمیشہ ساتھ دیں، خراب پرفارمنس پر میری ٹیم میں جگہ نہیں بنتی یہ میں خود کہتا ہوں، مجھ سے غلطیاں ہوئیں اس کا مقصد یہ نہیں کہ ہمت ہار بیٹھوں۔
ان کا کہنا تھا کہ میرے لیے کرکٹ جنون ہے اور میں اس کھیل سے محبت کرتا ہوں۔
