اسرائیلی فوج نے جنگ بندی کی خلاف ورزی کرتے ہوئے غزہ پر دوبارہ حملے شروع کر دیے جس کے نتیجے میں دو فلسطینی شہید ہوگئے۔
غزہ سول ڈیفنس کے مطابق غزہ کے جنوبی علاقے میں اسرائیلی حملوں سے4افراد زخمی بھی ہوئے ہیں، غزہ سٹی کے صبرہ محلے میں ایک گھر پر اسرائیلی فضائی حملہ کیا گیا۔
خبر رساں ادارے الجزیرہ کی رپورٹ کے مطابق فضائی حملہ اس علاقے میں کیا گیا جہاں سے اسرائیلی فوج معاہدے کے تحت پیچھے ہٹی تھی، غزہ سٹی کے مغرب میں الشاطی پناہ گزین کیمپ پر بھی فضائی حملہ کیا گیا۔
مرکزی غزہ میں دیرالبلح کے مشرقی علاقوں پر اسرائیلی توپ خانے کی جانب سے گولہ باری کی گئی، غزہ سٹی میں الشفا اسپتال کے اطراف بھی اسرائیلی بمباری کی گئی۔
واضح رہے کہ انسانیت سوز مظالم ڈھانے والے امن کے دشمن اسرائیل نے ایک بار پھر غزہ پر شدید حملے شروع کر دیے۔
اسرائیلی وزیرِ اعظم بنیامین نیتن یاہو کے حکم کے بعد اسرائیلی طیاروں نے غزہ شہر پر دوبارہ فضائی حملے شروع کر دیے، اسرائیل نے شمالی غزہ کے اسپتال کے قریب حملہ کیا ہے۔
سول ڈیفنس غزہ کے مطابق اسرائیل کی جانب سے غزہ کی پٹی پر 3 فضائی حملے کیے گئے ہیں۔
اس سے قبل اسرائیلی وزیرِ اعظم بنیامین نیتن یاہو نے ایک بار پھر جنگ بندی کی خلاف ورزی کرتے ہوئے اسرائیلی فوج کو غزہ میں فوری حملے کرنے کا حکم دیا تھا۔
