اسلام آباد : جمعیت علما اسلام (جے یو آئی ف ) کے سربراہ مولانا فضل الرحمان نے کہا ہے کہ ایک سال میں دوسری ترمیم آرہی ہے، آئین سے کھلواڑ نہیں کرنا چاہیے۔
پاکستان تحریک انصاف کے وفد سے ملاقات کے بعد میڈیا سے گفتگو کرتے ہوئے مولانا فضل الرحمن نے کہا کہ کسی کو بھی آئین سے کھلواڑ نہیں کرنا چاہیے۔
فضل الرحمان کا کہنا تھا کہ یہ آئینی ترامیم جبر سے منظور کی جائیں گی اور اگر یہی حال رہا تو عوام کا آئین پر کیا اعتماد رہ جائے گا؟
مولانا فضل الرحمان نے کہا کہ پہلے ہم نے34 شقوں سے حکومت کو دستبردار کروایا تھا، جو مواد 26ویں ترمیم سے بچایا اب پھر وہی کرنے کی تیاری کی جارہی ہے، ہمیں تاحال 27ویں آئینی ترمیم کا مسودہ نہیں ملا ہے۔
27ویں ترمیم پر پوری اپوزیشن مل کر متفقہ رائے بنائے گی، معتدل ماحول کو شدت کی طرف لے جایا جارہا ہے، ایک وزیر 3 ماہ سے اس ترمیم پر کام کررہا ہے۔
اس کا مطلب ہے کہ یہ ترمیم کہیں اور سے آئی ہے، اسحاق ڈار کل تک تو یہ کہتے تھے کہ ابھی 26ویں ترمیم ہضم نہیں ہوئی اور اب یہ 27ویں ترمیم بھی لارہے ہیں۔
فیصل واوڈا کوئی پیغام لے کر نہیں آئے تھے، فضل الرحمان
اس سے قبل جمعیت علمائے اسلام ف کے سربراہ مولانا فضل الرحمان نے پارلیمنٹ ہاؤس کے باہر میڈیا سے گفتگو کرتے ہوئے آج سینیٹر فیصل واوڈا سے ہونے والی ملاقات سے متعلق بتایا کہ ان سے ملاقاتیں ہوتی رہتی ہیں۔ آج ملاقات میں وہ کوئی خاص پیغام لے کر نہیں آئے تھے۔
فضل الرحمان کا کہنا تھا کہ 27 ویں آئینی ترمیم کا مسودہ آئے گا تو پھر ہم دیکھیں گے۔ ابھی جب تک ترمیم کا مسودہ نہیں آیا تو ہم نکات بات نہیں کرسکتے۔ ہوا میں باتیں نہیں اڑانی چاہئیں۔
جے یو آئی سربراہ نے کہا کہ سنا ہے کہ بلاول بھٹو زرداری نے کوئی پرچہ آؤٹ کیا ہے، اب یہ پتہ نہیں کہ انہوں نے صحیح پرچہ آؤٹ کیا ہے یا نہیں۔
